坐骨神經痛

坐骨神經痛 (Sciatica) 其實唔係一個準確既診斷，而係概括咁形容徵狀，好似頭痛咁都係形容徵狀。通常腰背痛會扯到落腳(包括屁股、大腿、小腿、腳板、腳趾)，或者腰痛加埋腳麻痺，又或者淨係腳痺或者扯住痛而腰骨無咩痛都會有人叫依種唔舒服做坐骨神經痛。其中最常見既原因都係腰椎神經根受壓，常見可能性包括椎間盤凸出，退化有關椎管狹窄;機會較低但更嚴重例如腫瘤。

臨床檢查可能會發現以下一項或多項：

1. 伸直腿抬高會扯到腰同腳都會痛 (神經拉扯測試陽性反應)
2. 摸落隻腳感覺唔多清楚好似層皮厚咗，分唔到針拮定手摸 (下肢表皮觸感異常)
3. 反射錘揼落去膝頭/腳跟條肌腱會唔識彈 (下肢神經反射異常)
4. 有啲肌肉發唔到力甚至郁唔到 (下肢肌力減弱)

另外有啲問題雖然唔係腰椎神經根受壓但係徵狀都會好似，例如腰椎同盤骨錯位都可以反射到臀部同大腿痛；髖關節退化問題，梨狀肌症候群都會有臀部同大腿拉扯痛。所以如果有 ”坐骨神經痛”，最好都係搵脊醫檢查清楚，搵出病因先可以針對性治療。

• 腰背痛會扯埋落腳
• 腰痛加埋腳麻痺
• 腳痺或者扯住痛/刺痛而腰骨無咩痛
• 大腿/小腿/腳趾無力
• 坐得耐/企得耐/咳/打乞嚏徵狀會加劇

最常見既病因係腰椎神經根 L4, L5, S1 壓迫 (Lumbar radiculopathy)，神經血液循環減慢令功能下降，引起痲痺同無力；炎症引起既化學刺激會引起痛楚，好似俾火燒，俾電電親或者好似俾刀仔拮咁。

神經根受壓原因包括：

1. 椎間盤突出：直接壓迫到喺佢隔離經過既神經。
2. 椎管狹窄：椎管周圍既關節增生同韌帶增厚加埋椎間盤突出壓到神經。
3. 腫瘤：如果生喺脊椎旁邊同盤腔都可以壓迫神經。
4. 感染：雖然較罕見，但引起既化學刺激同水腫一樣會壓到神經。
5. 梨狀肌：坐骨神經喺臀部穿過依條肌肉下面而壓 ，無壓到神經但症狀好似既問題。
6. 椎間盤退化：壓力增加(向前彎腰/拎重嘢)或者壓力改變(坐得耐起身)都可以扯到隻腳痛。
7. 腰椎小關節/盤骨錯位：痛楚可以反射到臀部同大腿痛，比較少去到小腿同腳板。
8. 髖關節退化：會引致臀部同大腿拉扯痛。

每年有 2.2% 人口會有腰椎間盤有關既坐骨神經痛，5-10% 有腰背痛既人會有坐骨神經痛。

1. 吸煙：會增加身體發炎有關既化學物質，減慢椎間盤的循環﹐引致椎間盤退，又會減慢身體癒合速度影響復原。
2. 職業司機：成日坐都係增加椎間盤壓力既原因，而機械不斷震動又再增加椎間盤既壓力。
3. 高負重工作：重複搬運重物亦都係椎間盤受壓增加引致退化既原因。

1. 病歷問診：了解病歷有助判斷病因同決定使唔使用影像同化驗檢查去排除或者確定病因。
2. 身體檢查：脊醫會要你向前後左右彎腰，仲會試吓對腳既力量，表皮感覺同神經反射，又會要你瞓低再托起隻腳睇吓有無痛，再觸檢脊骨既活動，活動阻力，排列，周邊肌肉張力同軟組織狀態等等。
3. 影像檢查
   • X光 ：通常最基本都係照 X 光先，睇吓有無異常，同時可以睇到脊骨既排列，退化程度，亦都可以幫助尋找錯位。時間短，費用較低，幅射量較小。
   • 電腦掃瞄 CT：如果懷疑有X光睇唔到既斷裂，例如椎弓斷裂 (PARS FRACTURE)；或者想清楚椎間盤同旁邊既神經線同軟組織但又唔可以照 MRI 時會做 (例如身體入面有金屬而唔可以照  MRI)。需時較短，貴過 X 光平過 MRI，幅射量較大。
   • 磁力共震 MRI：最清楚睇到脊骨，椎間盤，神經根同其他軟組織 (如果有腫瘤都會睇到)。要預約，時間較長，貴過 CT 同 X 光，但係無幅射，同時因為睇到最多資訊而時有同病症無關既發現。
4. 化驗檢查：如果脊醫懷疑有感染或者其他系統性問題，就要抽血驗睇清楚身體狀況。

坐骨神經痛治療方法主要分為兩大類：非手術治療，以及手術治療。一般會先由非手術去開始，當情況太嚴重，才會用手術方式處理。

非手術治療

1. 教育：醫生檢查後，需要清晰講解病人聽發病的病因、有什麼治療方式、預計大約康復時間。讓病人可以減少不必要既擔憂，從而去制定一個比較詳細治療方案 (treatment plan) ，令病人較易遵從醫生的治療方式。
2. 脊骨矯正：受專業訓練的脊醫主要會用手力治療去輔助其他儀器幫助處理坐骨神經痛，透過手力治療檢查，去找出錯位關節。然後用精確快速輕巧  (HVLA: High Velocity Low Amplitude) 既徒手技巧矯正錯位關節，從而減輕周邊地方的痛楚、放鬆痙攣肌肉、改善脊骨活動和椎間盤的循環。物理治療師亦都有受手力治療相關既訓練，運用唔同幅度同程度既被動活動去改善關節既郁動。
3. 運動治療：喺指導下去做脊骨活動、腰部同腿部肌肉伸展、或者是活動幅度運動，從而令到增加脊骨活動幅度增加、減少肌肉緊張、增加神經活動。徵狀改善之後可以加強腰腹臀部肌力同控制，減少復發；盡量喺徵狀許可下保持活動，中低強度非接觸性既運動其實都無問題。
4. 使用輔助儀器、藥物及注射治療：輔助儀器，包括了針刺的刺激、電刺激、超聲波、激光、牽引或減壓治療。另外也會用口服藥物同注射去減輕徵狀，醫師會開營養補充劑同維他命b嘅複合劑去幫助患者的神經修復、處方一些減輕發炎症狀嘅一啲營養補充劑去減少發炎徵狀，常用包括 NSAID 非類固醇消炎止痛藥，舒緩神經痛藥，肌肉放鬆藥或者口服類固醇，但係藥物並唔係治療病因，而係控制徵狀等你可以早啲開始活動。

如果以上方法都無效果，就需要去轉介個去睇西醫或骨科醫生。通常什麼情況會需要去搵西醫或骨科醫生幫手呢?

手術治療

如果非手術治療 3 個月都無改善，或者病人的下肢肌力不斷減弱，即使做緊治療下肢肌力仍會不斷減弱，就可能須要見西醫骨科專科醫生，睇睇有無必要做手術；再嚴重大小便控制有困難，簡單來說就是失禁，想去時去唔到，唔想去既時候自動去 (雖然機會非常小)，這些都是緊急情況，甚至要去急症室去處理問題，或可能要接受緊急手術。

除此之外，亦有注射治療，通常都是由西醫骨科醫生去處理，幫助病人去減輕徵狀。參考脊醫兄弟 “唐大暉” 的 YouTube 影片：

如果可以理解到個問題的病因，就找到一個合適的治療方案去處理。絕大部分的坐骨神經痛都可以在治療下改善，所以不要去拖延問題，及早檢查，及早處理。

Reference:

1. Sciatica. Ropper AH, Zafonte RD. N Engl J Med. 2015 Mar 26;372(13):1240-8.
2. Physiotherapy management of sciatica. Raymond WJG. J Physio. 2020 66(2)83-8.
3. Diagnosis and treatment of sciatica. Koes BW, van Tulder MW, Peul WC . BMJ 2007;334:1313-7.
4. The Effect of Smoking on the Risk of Sciatica: A Meta-analysis. Rahman Shiri, Kobra Falah-Hassani. Am J Med. 2016 Jan; 129(1): 64–73.e20.