睡眠影響健康。平時睇症俾人問得最多既問題之一就係:邊個枕頭最好?如何選擇枕頭?要解答依個問題首先要界定點先為之「最好」呢? 要推薦枕頭亦要有科學根據。我哋睇睇外國既研究可能會有幫助。

枕頭研究

澳洲就有人做咗份研究,睇吓用唔同質地同形狀既枕頭會點影響使用者瞓醒時候頭肩頸背既不適。(1) 佢哋隨機分配五種枕頭,包括:

  • 聚酯枕 (Polyester)
  • 長方形海棉枕 (Foam)
  • 中間凹既海棉枕 (Foam)
  • 乳膠枕 (Latex)
  • 羽毛枕 (Feather)

再同參與者用開既枕頭比較,睇吓用邊隻枕頭瞓醒會最唔舒服 (包括頸梗、頭痛、肩背痛)。結果係用羽毛枕瞓醒最多唔舒服;用乳膠枕就瞓醒最少唔舒服;聚酯枕同海棉枕就排中間,唔同形狀海棉枕就無分別。

枕頭研究

脊醫枕頭推薦

咁即係乳膠枕最好?都未必,因為份研究淨係睇習慣用單一個枕頭打側瞓既人,如果你習慣仰睡,研究結果就唔適用喇!

咁最好既枕頭喺邊呢?如何選擇枕頭?

可能就同揀男女朋友一樣…..其實就無最好,而係睇大家有幾夾!維持到平衡就得!

枕頭 頸椎

如果瞓住個枕頭,背部頸椎同胸椎連成一直線就算合適。所以側瞓、膊頭比較橫既人要用較厚既枕頭!間接解釋咗點解澳洲份研究會發現側瞓而用比較淋同扁既羽毛枕瞓醒最多唔舒服。

睡姿 選擇枕頭

咁如果習慣仰睡又應該點揀枕頭呢?頸椎既生理弧度前凸後凹,抑瞓時就好似U字上下反轉咁

"ᴒ",一般長方形既枕頭下端應該喺肩膊對上,頭部較頸部重,自然就會將枕頭壓得較扁而維持住頸梃弧度;而用有波浪形枕頭既話,通常都會有一邊比較厚,側瞓就適合厚嗰邊向床尾,配合肩膊外側同頸部較遠既距離;而抑睡就相反,適合厚嗰邊向床頭。

如果想知道個枕頭同自己夾唔夾,係唔使拎埋個枕頭去俾我地睇既……最好既方法就係用你習慣既睡姿瞓,再搵人喺唔同既角度影幾張相,咁就容易啲俾到好意見。影既時候記得唔好用被冚住頸背先睇得清楚。

終極問題:點解換極枕頭條頸都仲係痛?唔通問題係個制度?

其實問題可能就喺條頸度而唔喺個枕頭度。不良姿勢,重複低頭工作,受傷都有機會引起頸痛,脊骨錯位會令周邊肌肉繃緊,就算休息時都較難放鬆。上面份研究發現其實就算用瞓開感覺最好既枕頭既人都有 20 %訓醒有唔同程度既頸梗/頭痛/肩背痛。如果長時間有依啲問題,可以搵脊醫做個詳細檢查,搵出問題根源再作針對性治療。


  1. Gordon SJ, Grimmer-Somers KA, Trott PH. Pillow use: the behavior of cervical stiffness, headache and scapular/arm pain. J Pain Res. 2010;3:137–145. Published 2010 Aug 11. doi:10.2147/jpr.s10880
唐大暉 脊醫

唐大暉脊骨神經科醫生。專業資格:香港註冊脊醫、香港註冊物理治療師、美國西省大學脊骨神經科博士、香港理工大學物理治療(榮譽)學士、香港浸會大學物理治療師針灸專業進修文憑。專注範圍包括頭痛,頭暈,頸痛腰痛,椎間盤 突出,脊柱側彎,坐骨神經痛,肩周炎,孕婦背痛,學童脊骨保健,足底筋膜炎等等。